अनेक शस्त्रक्रिया पुढे ढकलल्या; मंत्री भेटत नसल्याचा संघटनेचा आरोप
मुंबई, दि. 19 जुलै : तुटपुंजा पगार व कंत्राटी (आउटसोर्सिंग/कंत्राटी नियुक्ती) पद्धतीने भरती करण्याच्या सरकारी निर्णयाविरोधात राज्यातील 30 हजारांहून अधिक परिचारिका बेमुदत संपावर गेल्या असून आझाद मैदानात धरणे आंदोलन सुरू आहे. मुंबईतील सुमारे पाच हजार परिचारिका या आंदोलनात सहभागी असल्याने येथील प्रमुख सरकारी रुग्णालयांतील कामकाजाचा मोठा भार शिकाऊ (ट्रेनिंगवरील) परिचारिकांवर पडला आहे. परिणामी काही नियोजित शस्त्रक्रिया पुढे ढकलल्याचे चित्र रुग्णालयांत दिसत आहे, अशी माहिती संघटनांकडून देण्यात आली.
संघटनेच्या म्हणण्यानुसार, 17 जुलै रोजी आपल्या मागण्यांसाठी आरोग्यमंत्री प्रकाश अबिटकर यांना भेट मागितली असता विधान भवन लॉबीत दोन आमदारांच्या गटांत झालेल्या गोंधळाचे कारण पुढे करून प्रतिनिधींना तब्बल तीन तास प्रतीक्षा करावी लागली; तरीही मंत्री भेटले नाहीत, असा आरोप राज्य खजिनदार राम सूर्यवंशी यांनी केला. “संपाचा परिणाम मर्यादित राहावा यासाठी नियोजन केले असून शिकाऊ परिचारिकांची नियुक्ती केली आहे,” असे जे. जे. रुग्णालयाचे वैद्यकीय अधीक्षक संजय सुरासे यांनी स्पष्ट केले.
५० टक्के पदे रिक्त
सरकारी रुग्णालयांतील सुमारे 50 टक्के परिचारिका पदे अद्याप रिक्त असल्याची स्थिती आहे. अशावेळी ही रिक्तता तात्पुरत्या कंत्राटी पद्धतीने भरून काढण्याच्या प्रयत्नाला आमचा विरोध आहे, असे संघटनेच्या सरचिटणीस सुमित्रा तोटे यांनी सांगितले.
‘फक्त तीन मिनिटांची वेळ’
“वैद्यकीय शिक्षणमंत्री हसन मुश्रीफ यांना व्यथा मांडण्यासाठी गेलो तर त्यांनी प्रचंड व्यस्त असल्याचे सांगत केवळ तीन मिनिटे वेळ दिली. इतक्या कमी वेळात सर्व मागण्या कशा मांडायच्या?” असा सवाल आंदोलनातील परिचारिकांनी उपस्थित केला.
परिचारिकांनी आपला संप तत्काळ मागे घ्यावा म्हणून सरकारने न्याय्य वेतनरचना व नियमित भरती प्रक्रियेबाबत सकारात्मक भूमिका घ्यावी, अशी मागणी संघटनेने केली असून चर्चेला निश्चित वेळ देण्याची हमी मिळेपर्यंत आंदोलन सुरू ठेवण्याचा इशाराही देण्यात आला आहे.
