प्रतिनिधी, सातारा
सातारा महापालिका निवडणुकीच्या पार्श्वभूमीवर भारतीय जनता पक्षाच्या प्रचारयंत्रणेत शिवेंद्रसिंहराजे भोसले यांनी सर्वंकष नेतृत्व घेऊन गती आणली आहे. खासदार उदयनराजे भोसले यांच्या प्रकृती अस्वास्थ्यामुळे गैरहजेरी असताना, शहरातील दोन्ही प्रभागांमध्ये ‘सबकुछ शिवेंद्रसिंहराजे’ असे चित्र प्रकर्षाने जाणवत आहे.
शिवेंद्रसिंहराजे यांनी पहिल्या टप्प्यात तब्बल ४१ कोपऱ्या सभा घेतल्या असून, दररोज सरासरी साडेसात ते दहा किलोमीटर पायपीट करत शहरातील सर्वच भागांत संपर्क साधला आहे. महिला मतदारसंख्येचे प्रमाण अधिक असल्याने त्यांच्याशी संवाद साधत आगामी विकासाची व्हिजन मांडण्यावरही त्यांचा भर आहे.
भाजपचे उमेदवार कुठेही कमकुवत पडू नयेत, तसेच स्वतंत्र उमेदवारांना धडा शिकवण्याची भूमिका आवश्यकतेनुसार घेत, संतुलित प्रचार मोहीम राबविण्यात ते यशस्वी ठरत असल्याचे पक्षातील सूत्रांचे मत आहे.
घरातील लगीनघाई आणि राजकीय धावपळीत समतोल
दरम्यान, शिवेंद्रसिंहराजे यांची कन्या ऋणाली राजे हिचा विवाह सोहळा पुढील आठवड्यात होत असताना, घरातील तयारीपेक्षा प्रचारावर त्यांचे अधिक लक्ष केंद्रित असल्याचे दिसते. विवाहसोहळ्याची सगळी जबाबदारी वहिनीसाहेब वेदांतिकाराजे भोसले यांनी स्वीकारली असून, राजकीय बांधिलक्यांना पाठबळ दिले आहे.
मुख्यमंत्र्यांकडून कार्याची दखल
साताऱ्यातील मोहिमेतील त्यांच्या सक्रियतेची दखल मुख्यमंत्री देवेंद्र फडणवीस यांनी घेतली आहे. प्रचाराबरोबर घरची जबाबदारी सांभाळण्याचा त्यांनी ठेवलेला समतोल हे त्यांचे राजकीय परिपक्वतेचे लक्षण असल्याची चर्चा शहरात रंगली आहे.
साताऱ्याचा प्रचारझपाटा कायम
उदयनराजेंची ताकद असलेल्या साताऱ्यात आता शिवेंद्रसिंहराजेंची प्रचारशैली ठळकपणे जाणवत आहे. नगरपालिका निवडणुकीत भाजपच्या उमेदवारांना बळ देण्याची धुरा त्यांनी हाती घेतल्याने शहरातील राजकीय समीकरणांत नवीन वारे येत असल्याचे चित्र आहे.
