वांद्रे पूर्व मतदारसंघ कायमच चर्चेचा विषय असतो. यावेळी वडील माजी मंत्री बाबा सिद्दीकी यांच्या हत्येनंतर विद्यमान आमदार झिशान सिद्दीकी पुन्हा एकदा निवडणुकीला सामोरे गेले. २०१९ मध्ये झिशान सिद्दीकींनी काँग्रेसच्या तिकिटावर निवडणूक लढवून शिवसेना उमेदवार विश्वनाथ महाडेश्वर यांचा पराभव केला होता. यावेळी त्यांनी उपमुख्यमंत्री अजित पवार यांच्या नेतृत्वातील राष्ट्रवादी काँग्रेस पक्षातून निवडणूक लढवली. मात्र त्यांना विजयाची पुनरावृत्ती करता आली नाही. वडिलांच्या हत्येनंतर मतदार सहानुभूती दाखवतील अशी आशा असताना झिशान सिद्दीकी यांचा पराभव झाला.

वरुण सरदेसाई मातोश्रीच्या अंगणात निवडणूक लढवत असल्या कारणाने ती रंगतदार होतीच, मात्र ठाकरे कुटुंबीयांच्या घरच्या मैदानात त्यांच्याच कुटुंबातील सदस्य उतरल्याची दुर्मीळ घटना यावेळी घडली. वांद्रे पूर्वची यंदाची लढतही तिहेरी होती. मात्र वरुण सरदेसाईंनी ९ हजार मतांची आघाडी घेत विजयी गुलाल उधळला. इंटरेस्टिंग म्हणजे वरुण सरदेसाई यांचे निवासस्थान पारल्यात असल्यामुळे ते स्वतःलाच मतदान करु शकले नव्हते.

गेल्या वेळी मतविभाजनाचा फटका बसून शिवसेना उमेदवाराचा पराभव झाला होता, आणि शिवसेनेचा बालेकिल्ला काँग्रेसच्या हाती गेला होता. त्यावेळी अपक्ष लढून शिवसेनेची मतं खाणाऱ्या माजी आमदार तृप्ती बाळा सावंत आता राज ठाकरे यांच्या महाराष्ट्र नवनिर्माण सेनेच्या तिकिटावर निवडणूक लढवत होत्या. यंदा शिवसेना-काँग्रेसची ताकद एकत्र झाली होती. त्यामुळे गेल्या वेळी प्रमाणेच यंदाही वांद्रे पूर्वची तिरंगी लढत लक्षवेधी झाली होती.

The post वांद्रे पूर्व जागेवर वरून सरदेसाईनी विजयाचा झेंडा फडकवला, झिशान सिद्दीकीला पराभूत केले. appeared first on Satara Pratinidhi.