मनसे अध्यक्ष राज ठाकरे यांना २००८ मधील रेल्वे भरती परीक्षेदरम्यान कल्याण रेल्वे स्थानकावर परप्रांतीय परीक्षार्थींना मारहाण झाल्याच्या प्रकरणात बुधवारी ठाणे जिल्हा न्यायालयात हजर राहावे लागले. तब्बल १८ वर्षांपासून सुरू असलेल्या या प्रकरणातील सुनावणीदरम्यान कोर्टात काही काळ तणावपूर्ण वातावरण निर्माण झाले. न्यायमूर्ती अभिजित व्ही. कुलकर्णी यांनी राज ठाकरे यांचा जबाब नोंदवताना त्यांना “तुम्हाला सगळं विचारेन तेव्हा सांगा, बोलायला संधी दिली जाईल,” असे स्पष्ट शब्दांत सांगितल्याने न्यायालयातील वातावरण अधिकच गंभीर झाले.

रेल्वे भरती प्रक्रियेदरम्यान कल्याण रेल्वे स्थानक परिसरात परप्रांतीय उमेदवारांना मारहाण झाल्याचा आरोप मनसे कार्यकर्त्यांवर ठेवण्यात आला होता. या घटनेनंतर पोलिसांनी अनेक मनसे कार्यकर्त्यांविरोधात गुन्हे दाखल केले होते. त्याचप्रमाणे, राज ठाकरे यांच्या कथित भडकावू भाषणांमुळेच कार्यकर्ते आक्रमक झाल्याचा आरोप करत त्यांनाही आरोपी करण्यात आले होते.

कोर्टात नेमकं काय घडलं?

ठाणे जिल्हा न्यायालयात सुनावणी सुरू होताच न्यायमूर्ती अभिजित कुलकर्णी यांनी आरोपींना हजर करण्याचे आदेश दिले. त्यानंतर राज ठाकरे न्यायालयाच्या समोर जाऊन उभे राहिले.

“तुमचे नाव राज श्रीकांत ठाकरे?” असा प्रश्न न्यायमूर्तींनी विचारला असता राज ठाकरे यांनी “हो” असे उत्तर दिले. त्यानंतर न्यायालयाने साक्षीदारांच्या जबाबांचा संदर्भ देत २००८ मध्ये परीक्षार्थींना मारहाण झाल्याचा उल्लेख केला. यावर राज ठाकरे यांनी तत्काळ “खोटं आहे…” अशी प्रतिक्रिया दिली.

न्यायालयाने पुढे शेख रहीम यांच्या फिर्यादीचा उल्लेख करत, अटक करण्यात आलेल्या आरोपी आकाश काळे याच्याकडून मनसेचे सदस्यत्व ओळखपत्र मिळाल्याचे नमूद केले. यावर राज ठाकरे यांनी “मी त्या वेळेस इथं नव्हतो…” असे सांगण्याचा प्रयत्न केला. मात्र, न्यायमूर्तींनी त्यांना मध्येच थांबवत “तुम्हाला सगळं विचारेन तेव्हा सांगा, बोलायला संधी दिली जाईल,” असे स्पष्ट केले.

यानंतरही राज ठाकरे यांनी “हे सगळं खोटंय,” अशी भूमिका कायम ठेवली. तपास अधिकारी अरुण जगताप यांनी राज ठाकरे यांच्याविरोधात गुन्हा दाखल करण्यासाठी परवानगी घेतल्याचा उल्लेख न्यायालयाने केला असता, “तत्कालीन सरकारच्या दबावाखाली खोटा गुन्हा दाखल करण्यात आला,” असा दावा राज ठाकरे यांनी केला.

तपास अधिकाऱ्यांनी राज ठाकरे यांच्या कथित चिथावणीखोर भाषणांच्या सीडी जप्त करून त्याचा तपासात समावेश केल्याचेही न्यायालयाने नमूद केले. त्यावर “मुळात मी तिथे नव्हतो, मी तेव्हा नाशिकमध्ये होतो,” असे उत्तर राज ठाकरे यांनी दिले.

शेवटी न्यायालयाने त्यांचा जबाब नोंदवून सही करण्याचे निर्देश दिले.

१८ वर्षांपासून सुरू आहे सुनावणी

२००८ मध्ये रेल्वे भरती परीक्षेसाठी मोठ्या संख्येने उत्तर भारतीय उमेदवार मुंबई आणि कल्याण परिसरात आले होते. त्या काळात मनसेकडून स्थानिकांना रोजगारात प्राधान्य देण्याची जोरदार भूमिका घेतली जात होती. त्याच पार्श्वभूमीवर कल्याण रेल्वे स्थानक परिसरात काही उमेदवारांना मारहाण झाल्याचा आरोप झाला आणि राज्यभरात मोठा राजकीय वाद निर्माण झाला होता.

या प्रकरणाची सुरुवातीला कल्याण न्यायालयात सुनावणी झाली. नंतर प्रशासकीय कारणांमुळे प्रकरण ठाणे जिल्हा न्यायालयात वर्ग करण्यात आले. याआधीही राज ठाकरे यांना ११ मनसे कार्यकर्त्यांसह न्यायालयात उपस्थित राहावे लागले होते. मागील सुनावणीवेळी त्यांच्या वकिलांनी वारंवार वैयक्तिक उपस्थितीची गरज नसल्याचा युक्तिवाद केला होता. मात्र, पुढील न्यायालयीन प्रक्रियेअंतर्गत पुन्हा एकदा त्यांना स्वतः न्यायालयात हजर राहावे लागले.

दरम्यान, या सुनावणीनंतर राजकीय वर्तुळात पुन्हा एकदा २००८ मधील उत्तर भारतीयांविरोधातील आंदोलनाचा मुद्दा चर्चेत आला असून, पुढील सुनावणीकडे सर्वांचे लक्ष लागले आहे.

The post “तुम्हाला सगळं विचारेन तेव्हा सांगा…” ; ठाणे कोर्टात राज ठाकरे यांना न्यायमूर्तींचा इशारा, २००८ च्या प्रकरणात रंगली सुनावणी” appeared first on Satara Pratinidhi.

मुंब्रा येथील एमआयएमच्या नवनिर्वाचित नगरसेविका सहर शेख आणि त्यांचे वडील युनूस शेख यांच्याविरोधात करण्यात आलेल्या बनावट जात प्रमाणपत्राच्या आरोपांना अखेर त्यांनी सार्वजनिकरित्या उत्तर दिले आहे. काही दिवसांपासून ‘नॉट रिचेबल’ असल्याच्या चर्चांना पूर्णविराम देत दोघांनी पत्रकार परिषद घेऊन सर्व आरोप फेटाळले, तसेच संबंधित कागदपत्रे सादर करत तक्रारदारांवरच गंभीर आरोप केले.

गेल्या काही दिवसांत सहर शेख यांनी बनावट जात प्रमाणपत्राच्या आधारे निवडणूक लढवली असल्याचा आरोप करण्यात आला होता. या प्रकरणी पोलिसांत तक्रार दाखल झाल्यानंतर शेख कुटुंब सार्वजनिकरित्या समोर येत नसल्याने विविध चर्चांना उधाण आले होते. मात्र, सोमवारी त्यांनी पत्रकार परिषद घेऊन संपूर्ण प्रकरणावर आपली भूमिका स्पष्ट केली.

यावेळी युनूस शेख यांनी सांगितले की, “आमच्याविरोधात गेल्या तीन-चार दिवसांत जाणीवपूर्वक वातावरण निर्माण करण्यात आले. सहरच्या जात प्रमाणपत्राची अधिकृत पडताळणी झालेली असून, त्याला आव्हान द्यायचे असल्यास संबंधितांनी थेट उच्च न्यायालयात जाणे अपेक्षित होते. मात्र तसे न करता माझ्या प्रमाणपत्रावर प्रश्नचिन्ह उपस्थित करून आम्हाला लक्ष्य करण्यात आले.”

‘गायब’ असल्याच्या चर्चांवर स्पष्टीकरण

चार-पाच दिवस संपर्कात नसल्याच्या चर्चांबाबत बोलताना त्यांनी सांगितले की, “पत्रकारांकडून सतत प्रतिक्रिया मागवली जात होती. सर्वांना एकाचवेळी माहिती देता यावी यासाठी आम्ही पत्रकार परिषद घेण्याचा निर्णय घेतला. काही माहिती अधिकारातून मागवलेली कागदपत्रे येणे बाकी होते, त्यामुळे थोडा विलंब झाला.”

प्रमाणपत्राबाबत सविस्तर मांडणी

आपले जात प्रमाणपत्र पूर्णतः वैध असल्याचा दावा करत युनूस शेख म्हणाले, “सुमारे १५ वर्षांपूर्वी ठाणे तहसीलदारांकडून मला प्रमाणपत्र देण्यात आले आहे. त्यावर अधिकाऱ्यांची सही आहे. हेच प्रमाणपत्र पुढे माझ्या मुलांच्या कागदपत्रांसाठी वापरले गेले. २०१८ मध्ये सहरच्या प्रमाणपत्रासाठीही तेच सादर करण्यात आले आणि त्याची अधिकृत पडताळणीही झाली आहे.”

तहसीलदारांकडून दिलेल्या अहवालावर त्यांनी प्रश्नचिन्ह उपस्थित करत म्हटले की, “आम्ही सादर केलेल्या मूळ प्रमाणपत्राचा उल्लेख न करता आमच्याविरोधात अहवाल देण्यात आला. केवळ सात दिवसांत असा अहवाल तयार होणे संशयास्पद आहे.”

माहिती अधिकारातील विसंगतींचा मुद्दा

तक्रारदारांच्या कागदपत्रांबाबत माहिती अधिकारातून माहिती मागवली असता २००८ नंतरचा नोंदवही उपलब्ध नसल्याचे उत्तर मिळाल्याचा दावा त्यांनी केला. “जर नोंदीच उपलब्ध नसतील, तर एखाद्याचे प्रमाणपत्र बनावट कसे ठरवले जाते?” असा सवाल त्यांनी उपस्थित केला.

स्थलांतराच्या मुद्द्यावर प्रत्युत्तर

उत्तर प्रदेशातून स्थलांतरित असल्यामुळे महाराष्ट्रातील जात लागू होत नसल्याच्या आरोपांनाही त्यांनी उत्तर दिले. “माझे वडील १९५५ मध्येच महाराष्ट्रात स्थायिक झाले. माझा जन्म मुंबईतच झाला आहे. शासनाच्या नियमांनुसार ओबीसींसाठी १९६७ ही डीम्ड डेट आहे. त्या आधीच आम्ही महाराष्ट्रात असल्यामुळे आम्हाला स्थलांतरित मानले जाऊ शकत नाही,” असे त्यांनी स्पष्ट केले.

‘राजकीय कटकारस्थान’ असल्याचा आरोप

या सर्व प्रकरणामागे राजकीय हेतू असल्याचा आरोप करत युनूस शेख म्हणाले, “माझ्या मुलीने राजकारणात पाऊल टाकताच आम्हाला लक्ष्य करण्यात आले. हे संपूर्ण प्रकरण कटकारस्थानाचा भाग आहे.”

दरम्यान, या प्रकरणातील सत्यता काय, याबाबत अंतिम निर्णय संबंधित प्रशासकीय व न्यायालयीन प्रक्रियेतूनच स्पष्ट होणार असून, या वादामुळे मुंब्रा परिसरातील राजकारणात चांगलीच खळबळ उडाली आहे.

The post जात प्रमाणपत्र वादाला नवं वळण; सहर शेख-युनूस शेख यांचा खुलासा, तक्रारदारांवर पलटवार appeared first on Satara Pratinidhi.

भारतीय रेल्वेच्या इतिहासातील सुवर्णपान ठरलेल्या ठाणे रेल्वे स्थानक चा १७३ वा वर्धापन दिन आज, गुरुवारी उत्साहात साजरा करण्यात येणार आहे. देशातील पहिल्या रेल्वे प्रवासाच्या साक्षीदार ठरलेल्या या स्थानकाच्या वाढदिवसानिमित्त विविध रेल्वे प्रवासी संघटनांनी कार्यक्रमाचे आयोजन केले असून नागरिकांनी मोठ्या संख्येने सहभागी व्हावे, असे आवाहन करण्यात आले आहे.

भारतातील पहिली रेल्वेगाडी १६ एप्रिल १८५३ रोजी बोरीबंदर ते ठाणे रेल्वे स्थानक या मार्गावर धावली होती. सुमारे ३३.८ किमी अंतर केवळ ५७ मिनिटांत पार करणाऱ्या या ऐतिहासिक प्रवासात ‘साहिब, सिंध आणि सुलतान’ या वाफेच्या इंजिनांनी १४ डब्यांची गाडी ओढली होती. या गाडीत सुमारे ४०० पाहुणे प्रवासी होते. भारतीय रेल्वेच्या प्रवासाची ही सुरुवात आजही अभिमानाने स्मरली जाते.

या ऐतिहासिक घटनेच्या स्मरणार्थ दरवर्षीप्रमाणे यंदाही ठाणे रेल्वे प्रवासी संघटनेच्या वतीने कार्यक्रमाचे आयोजन करण्यात आले आहे. संघटनेचे अध्यक्ष नंदकुमार देशमुख आणि पदाधिकारी सुधाकर पतंगराव यांच्या पुढाकाराने आज सकाळी ११ वाजता स्थानकाच्या फलाट क्रमांक एकजवळील जुन्या रेल्वे इंजिनाजवळ मुख्य कार्यक्रम पार पडणार आहे.

कार्यक्रमाला खासदार नरेश म्हस्के, जिल्हाधिकारी कृष्णा पांचाळ, आयुक्त सौरभ राव, आमदार संजय केळकर आणि निरंजन डावखरे यांची उपस्थिती अपेक्षित आहे.

दररोज लाखो प्रवाशांची वर्दळ असलेल्या ठाणे स्थानकाच्या आधुनिकीकरणासाठी विविध पायाभूत प्रकल्प राबवले जात आहेत. पश्चिमेकडील सॅटीस पुलानंतर आता पूर्वेकडील सॅटीस पुलाचे कामही वेगाने सुरू असून, सुमारे २.२४ किमी लांबीचा उन्नत मार्ग, १२ मीटर रुंद मार्गिका आणि सुमारे ९ हजार चौरस मीटर डेक उभारण्यात येणार आहे. याशिवाय ११ मजली बहुउद्देशीय इमारतीत वाहनतळ, रेल्वे व बस सेवा तसेच व्यापारी संकुल उभारण्याची योजना आहे.

दरम्यान, १८५३ मध्ये सुरू झालेल्या या रेल्वे प्रवासाचा विस्तार आज देशाच्या कानाकोपऱ्यात झाला आहे. प्रारंभीची ग्रेट इंडियन पेनिन्सुला रेल्वे कंपनी पुढे १९०० मध्ये इंडियन मिडलँड रेल्वेत विलीन झाली आणि दिल्ली, कानपूर, अलाहाबाद ते नागपूर व रायचूरपर्यंत विस्तारली. पुढे ३ फेब्रुवारी १९२५ रोजी बॉम्बे व्हीटी ते कुर्ला दरम्यान देशातील पहिली इलेक्ट्रिक रेल्वे सेवा सुरू झाली, ज्यामुळे भारतीय रेल्वेच्या विद्युतीकरणाचा पाया रचला गेला.

इतिहासाचा साक्षीदार असलेले ठाणे स्थानक आजही आधुनिकतेकडे वाटचाल करत असताना आपल्या समृद्ध वारशाची आठवण करून देत आहे.

The post ठाणे रेल्वे स्थानकाचा आज १७३ वा वर्धापन दिन; ऐतिहासिक वारशाचा उत्सव appeared first on Satara Pratinidhi.

कळवा-मुंब्रा मतदारसंघातील राजकीय वर्तुळात चर्चेचा विषय ठरलेली ‘कैसे हराया’ ही घोषणा आता सहर शेख यांच्यासाठीच अडचणीचे कारण ठरताना दिसत आहे. ठाणे महानगरपालिका निवडणुकीत विजय मिळवल्यानंतर चर्चेत आलेल्या सहर शेख आणि त्यांचे वडील युनूस शेख यांच्याविरोधात जात प्रमाणपत्र प्रकरणात गंभीर अनियमितता झाल्याचा प्राथमिक निष्कर्ष प्रशासनाच्या चौकशीत समोर आला आहे.

या प्रकरणामुळे सहर शेख यांचे नगरसेविका पद धोक्यात आले असून त्यांच्या विरुद्ध फौजदारी गुन्हा दाखल होण्याची शक्यता निर्माण झाली आहे. ठाणे तहसीलदारांनी सादर केलेल्या अहवालात सहर शेख यांचे जात प्रमाणपत्र प्रथमदर्शनी अवैध असल्याचे नमूद करण्यात आले आहे.

चार शासकीय यंत्रणांची दिशाभूल

चौकशीत असे आढळून आले की, संबंधितांनी बनावट किंवा दिशाभूल करणाऱ्या कागदपत्रांच्या आधारे राज्यातील चार महत्त्वाच्या शासकीय यंत्रणांकडून लाभ घेतला. यात राज्य निवडणूक आयोग, ठाणे उपविभागीय अधिकारी कार्यालय, मुंबई शहर जिल्हाधिकारी कार्यालय आणि जात प्रमाणपत्र पडताळणी समितीचा समावेश आहे. या सर्व यंत्रणांना सादर करण्यात आलेल्या कागदपत्रांमध्ये विसंगती असल्याचे निदर्शनास आले आहे.

‘नमुना ८’चा वापर, ‘नमुना १०’चा अभाव

तक्रारदार जावेद सिद्दीकी यांनी केलेल्या तक्रारीनुसार, युनूस शेख हे मूळचे उत्तर प्रदेशातील गाझियाबाद येथील रहिवासी असून महाराष्ट्रात स्थलांतरित झाल्यानंतर त्यांना ‘नमुना १०’ अंतर्गत प्रक्रिया करणे अपेक्षित होते. मात्र, त्यांनी ‘नमुना ८’ चा वापर करून इतर मागास प्रवर्ग (OBC) प्रमाणपत्र मिळवले, असा आरोप आहे.

याच प्रमाणपत्राच्या आधारे सहर शेख यांनी निवडणूक लढवून विजय मिळवला. त्यामुळे आरक्षणाच्या निकषांचे उल्लंघन झाल्याचा ठपका प्रशासनाने ठेवला आहे.

कागदपत्रांतील गंभीर त्रुटी

तहसीलदारांच्या अहवालात अनेक विसंगती अधोरेखित करण्यात आल्या आहेत. सहर शेख यांनी सादर केलेल्या जात दाखल्यावर महाराष्ट्र शासनाचा उल्लेख नसणे, अधिकाऱ्यांची स्वाक्षरी नसणे, तसेच युनूस शेख यांच्या शालेय दाखल्यांमधील नावातील बदल यांसारख्या बाबी संशय निर्माण करणाऱ्या ठरल्या आहेत.

याशिवाय, संबंधित कुटुंबीयांचे मूळ वास्तव्य गाझियाबाद येथे असल्याचेही तपासात स्पष्ट झाले आहे. अशा परिस्थितीत मुंबई शहर जिल्हाधिकारी कार्यालयातून जात प्रमाणपत्र कसे मिळाले, हा प्रश्न उपस्थित केला जात आहे.

सुनावणीतील घडामोडी

या प्रकरणातील पहिली सुनावणी टाळल्यानंतर दुसऱ्या सुनावणीत प्रशासनाने सादर केलेल्या पुराव्यांमुळे प्रकरण अधिकच गंभीर झाले आहे. संबंधितांकडून सादर करण्यात आलेल्या कागदपत्रांची विश्वासार्हता संशयास्पद असल्याचे प्रशासनाचे मत आहे.

गुन्हा दाखल होण्याची शक्यता

उपविभागीय अधिकारी आणि कोकण विभागीय जात पडताळणी समितीने या प्रकरणात फौजदारी कारवाईची शिफारस केली आहे. खोटी माहिती देणे, कागदपत्रांमध्ये फेरफार करणे आणि शासकीय यंत्रणांची दिशाभूल करणे या आरोपांखाली गुन्हा दाखल होऊ शकतो.

दरम्यान, या प्रकरणामुळे ठाणे महानगरपालिकेच्या राजकारणात खळबळ उडाली असून, सहर शेख यांचे पद रद्द होण्याची शक्यता व्यक्त केली जात आहे. प्रशासनाच्या अंतिम निर्णयाकडे सर्वांचे लक्ष लागले आहे.

The post “कैसे हराया’ म्हणणाऱ्या सहर शेख आता स्वतःच वादाच्या भोवऱ्यात” जात प्रमाणपत्र बनावट असल्याचा आरोप appeared first on Satara Pratinidhi.

डॉ. बाबासाहेब आंबेडकर जयंती निमित्त ठाणे शहरात मोठ्या उत्साहात विविध कार्यक्रमांचे आयोजन करण्यात आले असून शहरासह उपनगरांमध्ये एकूण ६४ मिरवणुका काढण्यात येणार आहेत. या पार्श्वभूमीवर वाहतूक कोंडी टाळण्यासाठी ठाणे पोलीस आयुक्तालयाने मंगळवारी सकाळी ९ ते रात्री १२ वाजेपर्यंत महत्त्वाच्या मार्गांवर वाहतुकीत बदल लागू केले आहेत.

कोर्ट नाका, ठाणे रेल्वे स्थानक परिसर, खोपट, कोपरी आनंदनगर, धामणकर नाका, डोंबिवली पूर्व-पश्चिम, कल्याण फाटा, उल्हासनगर गोल मैदान तसेच सुभाष टेकडी या भागांतून मिरवणुका निघणार असल्याने या ठिकाणी विशेष बंदोबस्त ठेवण्यात आला आहे. खोपट येथून सकाळी संविधान रॅली काढण्यात येणार असून कोर्ट नाका आणि स्थानक परिसरातील डॉ. आंबेडकर स्मारकाजवळ तसेच कोपरी भागात विविध सांस्कृतिक कार्यक्रम होणार आहेत. सायंकाळच्या सुमारास मोठ्या मिरवणुकांची गर्दी अपेक्षित असल्याने पोलिसांनी नागरिकांना पर्यायी मार्गांचा वापर करण्याचे आवाहन केले आहे.

ठाणे शहरातील प्रमुख बदल

जीपीओ ते कोर्ट नाका मार्गे ठाणे रेल्वे स्थानकाकडे जाणाऱ्या वाहनांना जीपीओ येथे प्रवेश बंद राहील. ही वाहने सेंट्रल मैदान, ठाणे मध्यवर्ती कारागृह, दादोजी कोंडदेव स्टेडियम, अग्निशमन दल मार्गे वळविण्यात येतील. कळवा खाडी पुलाकडून येणाऱ्या वाहनांना उर्जिता उपाहारगृहाजवळ प्रवेशबंदी राहील.

सॅटीस पुलावरून जाणाऱ्या टीएमटी व एसटी बसांना टॉवर नाका व टेंभी नाका मार्गे प्रवेश न देता गोखले रोड, नौपाडा, हरिनिवास मार्गे वळविण्यात येणार आहे. टॉवर नाका–टेंभी नाका परिसरातील रिक्षा व चारचाकी वाहनांना मुस चौक येथे प्रवेशबंदी राहील.

कॅडबरी व नौपाड्याकडून डॉ. आंबेडकर रोडकडे जाणाऱ्या वाहनांना खोपट येथे अडवून कोलबाड व मिनाताई ठाकरे चौक मार्गे वळवले जाईल. तसेच आंबेडकर रोडवरून खोपटकडे येणाऱ्या वाहनांना उथळसर नाका मार्गे पर्यायी मार्ग देण्यात आला आहे.

डोंबिवलीत १० ठिकाणी बंदी

डोंबिवली पूर्व व पश्चिम भागात छत्रपती शिवाजी महाराज सर्कल, पाटणकर चौक, कोपर ब्रिज, रेतीबंदर चौक, म्हसोबा चौक, ठाकुर्ली टी-पॉइंट आदी दहा ठिकाणी वाहनांना प्रवेश बंद राहील. नागरिकांनी पर्यायी मार्गांचा वापर करावा, असे आवाहन करण्यात आले आहे.

भिवंडीतील निर्बंध

धामणकर नाका व रांजनोली चौकातून स्व. आनंद दिघे चौक आणि केशरबाग नाका येथे सर्व प्रकारच्या वाहनांना प्रवेशबंदी राहील. या वाहनांना वंजारपट्टी मार्गे वळविण्यात येणार आहे.

उल्हासनगरमध्ये पार्किंगलाही मनाई

गोल मैदान, नेहरू चौक, न्यू इरा चौक, शिवाजी चौक ते डॉ. आंबेडकर चौक या मार्गावर वाहन उभी करण्यास सक्त मनाई करण्यात आली आहे. सुभाष टेकडी ते लाल चक्की चौक दरम्यान मिरवणूक संपेपर्यंत पूर्णतः प्रवेशबंदी राहील.

कल्याणमध्येही बदल

कल्याण पश्चिमेतील नेताजी सुभाषचंद्र चौक व कल्याण फाटा येथे वाहनांना प्रवेशबंदी राहील. ही वाहने मुंब्रा बाह्यवळण, खारेगाव व मुंबई-नाशिक महामार्गाने वळवली जातील. शहाड जकात नाका मार्गे स्थानकाकडे जाणाऱ्या वाहनांना प्रेम ऑटो सर्कल येथे अडविण्यात येईल. तसेच जड-अवजड वाहनांसाठी काही मार्ग पूर्णतः बंद ठेवण्यात आले आहेत. याची वाहन चालकांनी दखल घ्यावी.
दरम्यान, मोठ्या संख्येने नागरिक कार्यक्रमांना उपस्थित राहणार असल्याने पोलिसांनी संयम राखून वाहतूक नियमांचे पालन करण्याचे आवाहन केले आहे. पर्यायी मार्गांचा अवलंब केल्यास वाहतूक सुरळीत ठेवण्यास मदत होईल, असेही प्रशासनाने स्पष्ट केले आहे.

The post ठाण्यात आंबेडकर जयंतीनिमित्त वाहतुकीत बदल; पर्यायी मार्गांचा वापर करण्याचे आवाहन appeared first on Satara Pratinidhi.

ठाणे: स्वराज्य पोलीस मित्र पत्रकार संरक्षण आणि माहिती अधिकार संघटनेच्या ठाणे व मुंबई विभागातील मुख्य पदाधिकाऱ्यांची महत्त्वपूर्ण बैठक ठाणे येथील रेल्वे ऑफिसमध्ये संपन्न झाली. या बैठकीत कल्याण येथील सामाजिक कार्यकर्त्या मेघना किरण पवार यांची संघटनेच्या ‘कल्याण तालुका संपर्क प्रमुख’ पदी नियुक्ती करण्यात आली आहे. ५ एप्रिल रोजी सायंकाळी झालेल्या या सभेत संघटनेच्या वरिष्ठ पदाधिकाऱ्यांच्या हस्ते मेघना यांचा विशेष सन्मान करून त्यांना पुढील जबाबदारी सोपवण्यात आली.

मेघना पवार या संघटनेच्या ठाणे जिल्हा उपाध्यक्ष उज्वला किरण पवार यांच्या कन्या आहेत. ‘रक्तदान हेच महादान’ हा मंत्र जपत मेघना यांनी केवळ महाराष्ट्रच नव्हे, तर इतर राज्यांतही सामाजिक क्षेत्रात उल्लेखनीय कार्य केले आहे. त्यांच्या या सेवाभावी वृत्तीची आणि संघटनेप्रती असलेल्या निष्ठेची दखल घेत ही निवड करण्यात आली. या प्रसंगी उपस्थित सर्व मान्यवरांनी मेघना पवार यांच्या कार्याचे कौतुक केले आणि त्यांच्या भावी वाटचालीस शुभेच्छा दिल्या. या नियुक्तीमुळे कल्याण तालुक्यात संघटनेचे जाळे अधिक मजबूत होईल, असा विश्वास या वेळी व्यक्त करण्यात आला.

The post मेघना पवार यांची ‘स्वराज्य पोलीस मित्र’ संघटनेच्या कल्याण तालुका संपर्क प्रमुखपदी निवड appeared first on Satara Pratinidhi.

ठाणे : लोणावळा येथील एकविरा देवी मंदिर येथे होणाऱ्या यात्रेनिमित्त मुंबई-पुणे महामार्गावर तीन दिवस टोलमाफी जाहीर करण्यात आली आहे. मंगळवार, बुधवार आणि गुरुवार असे सलग तीन दिवस ही टोलमाफी लागू राहणार आहे.

देवी भक्तांसाठी आनंदाची बातमी — एकविरा आईच्या यात्रेसाठी तीन दिवस टोल माफ! pic.twitter.com/P7X4os90Pl

— Balya Mama – Suresh Rekha Gopinath Mhatre (@MeBalyaMama) March 22, 2026

राज्यातील आगरी-कोळी समाजाचे कुळदैवत असलेल्या एकविरा देवीच्या यात्रेसाठी दरवर्षी ठाणे, मुंबई, मुंबई उपनगर तसेच रायगड जिल्ह्यातील हजारो भाविक लोणावळा येथे दर्शनासाठी जात असतात. मोठ्या संख्येने भाविक वाहनांनी मुंबई-पुणे महामार्गाचा वापर करत असल्याने टोलमुळे आर्थिक भुर्दंड सहन करावा लागत होता. तसेच टोल नाक्यांवर अनेकदा वादाचे प्रसंग आणि वाहतूक कोंडीही होत होती.

या पार्श्वभूमीवर टोलमाफीची मागणी करण्यात आली होती. महामार्ग व टोल प्रशासनाने ही मागणी मान्य केली असून यात्रेच्या तीन दिवसांत टोलमाफी लागू राहणार असल्याची माहिती भिवंडी लोकसभा मतदारसंघाचे खासदार सुरेश म्हात्रे (बाळ्या मामा) यांनी दिली.

दरम्यान, टोलमाफीचा लाभ घेण्यासाठी खासदार सुरेश म्हात्रे यांचे अधिकृत पत्र आवश्यक असणार आहे. हे पत्र टोल नाक्यांवर दाखविल्यानंतर एकविरा देवीच्या भाविकांना टोलमाफी दिली जाणार असल्याची माहितीही त्यांनी दिली.

The post VIDEO | एकविरा देवी यात्रेनिमित्त मुंबई-पुणे महामार्गावर तीन दिवस टोलमाफी appeared first on Satara Pratinidhi.

ई-चलानच्या माध्यमातून राज्य सरकार महसूल वाढविण्याचा प्रयत्न करत असून वाहतूकदारांवर अन्यायकारक दंडाची कारवाई केली जात आहे, असा गंभीर आरोप वाहतूकदार संघटनांनी केला आहे. या पार्श्वभूमीवर ई-चलानविरोधात गुरुवारी आझाद मैदान येथे वाहनांसह मोर्चा काढण्याचा निर्णय घेण्यात आला असून त्यामुळे मुंबईत वाहतूक कोंडी होण्याची शक्यता वर्तविली जात आहे.

ई-चलानविरोधात ५ मार्चपासून संप पुकारण्याचा निर्णय विविध वाहतूकदार संघटनांनी घेतला आहे. या आंदोलनासाठी सर्व संघटनांनी एकत्र येत ‘महाराष्ट्र ट्रान्सपोर्ट ॲक्शन कमिटी’ची स्थापना केली आहे. बुधवारी ठाण्यातील शासकीय विश्रामगृहात घेतलेल्या पत्रकार परिषदेत समितीच्या सदस्यांनी आंदोलनाची माहिती दिली.

संघटनांच्या मते, वाहतूक नियमभंगाच्या कारवाईसाठी पोलिसांना ठरावीक लक्ष्य (टार्गेट) देण्यात येत असून त्याअंतर्गत मोठ्या प्रमाणावर दंडाच्या केसेस नोंदवल्या जात आहेत. त्यामुळे ई-चलानची संख्या सातत्याने वाढत असल्याचा आरोप करण्यात आला.

ई-चलानमधील दंडातून सवलत देण्यासाठी राज्य सरकारने समिती स्थापन करून तोडगा काढण्याचे आश्वासन दिले होते. मात्र अद्याप कोणताही निर्णय झालेला नाही, अशी नाराजी वाहतूकदारांनी व्यक्त केली. परिवहन मंत्री Pratap Sarnaik यांनीही ई-चलानमुळे वाहतूकदारांना अडचणी येत असल्याची कबुली दिली होती; मात्र ठोस निर्णय घेण्यात आलेला नाही, असे संघटनांचे म्हणणे आहे.

मुंबई महानगरातील सुमारे ४० हजार बसांचे प्रतिनिधित्व करणाऱ्या बस मालक संघटनेचे प्रवक्ते राजेंद्र पाटील आणि विजय यादव यांनी सांगितले की, ई-चलानच्या नावाखाली गैरप्रकार होत असून प्रत्येक कॉन्स्टेबलला कारवाईचे लक्ष्य दिले जात आहे. त्यामुळे ही व्यवस्था महसूल वाढविण्याचे साधन बनल्याचा आरोप त्यांनी केला. ई-चलान ही केवळ वाहतूकदारांसाठीच नव्हे तर सर्व वाहनधारकांसाठी जाचक ठरत असल्याने ती रद्द करण्याची मागणी त्यांनी केली.

‘पुराव्याविना दंडवसुली’चा आरोप

संघटनेचे पदाधिकारी के. व्ही. शेट्टी यांनी ई-चलान प्रक्रियेवर प्रश्नचिन्ह उपस्थित केले. त्यांच्या मते, ई-चलानसाठी वापरण्यात येणारी उपकरणे मान्यताप्राप्त नसून अनेक प्रकरणांत पुराव्याशिवायच दंड आकारला जातो. पुरावा म्हणून दिली जाणारी छायाचित्रे अनेकदा धुसर असतात, असेही त्यांनी सांगितले. या संपूर्ण प्रक्रियेला त्यांनी ‘सरकारची डिजिटल रॉबरी’ असे संबोधले.

या पार्श्वभूमीवर गुरुवारी आझाद मैदान येथे वाहनांसह भव्य मोर्चा काढण्यात येणार असून शासनाने तातडीने या प्रश्नावर तोडगा काढावा, अन्यथा आंदोलन तीव्र करण्याचा इशारा वाहतूकदार संघटनांनी दिला आहे.

The post ई-चलान म्हणजे ‘डिजिटल रॉबरी’; वाहतूकदार संघटनांचा आझाद मैदानावर मोर्चा appeared first on Satara Pratinidhi.

बारावीची परीक्षा देण्यासाठी घरातून निघालेल्या विद्यार्थ्याचा रेल्वे अपघातात मृत्यू झाल्याची दुर्दैवी घटना मंगळवारी सकाळी घडली. डोंबिवली येथील रहिवासी असलेला सोहम कठरे (वय १८) याचा मृतदेह कळवा आणि मुंब्रा रेल्वे स्थानकांदरम्यान रेल्वे रुळांजवळ आढळून आला. लोकल रेल्वेतील प्रचंड गर्दीमुळे तोल जाऊन तो खाली पडल्याने हा अपघात झाला असावा, असा प्राथमिक अंदाज व्यक्त करण्यात येत आहे.

सोहम कठरे हा डोंबिवली येथे आई-वडिलांसोबत वास्तव्यास होता. सध्या बारावीच्या परीक्षा सुरू असून, तो मंगळवारी सकाळी कळवा येथे परीक्षा केंद्रावर जाण्यासाठी लोकलने प्रवास करत होता. सकाळच्या वेळेत मध्य रेल्वे मार्गावर प्रवाशांची मोठी गर्दी असते. याच गर्दीतून प्रवास करत असताना कळवा–मुंब्रा दरम्यान तोल जाऊन तो रेल्वेगाडीतून खाली पडल्याची शक्यता पोलिसांकडून वर्तवण्यात येत आहे.

मंगळवारी सकाळी रेल्वे रुळांजवळ एक तरुण गंभीर जखमी अवस्थेत पडलेला असल्याची माहिती मिळाल्यानंतर ठाणे लोहमार्ग पोलिसांचे पथक घटनास्थळी दाखल झाले. पोलिसांनी तातडीने सोहम याला उपचारासाठी ठाणे जिल्हा शासकीय रुग्णालयात दाखल केले. मात्र, रुग्णालयात दाखल करण्यापूर्वीच त्याचा मृत्यू झाल्याचे डॉक्टरांनी घोषित केले.

या प्रकरणी ठाणे लोहमार्ग पोलीस ठाण्यात अकस्मात मृत्यूची नोंद करण्यात आली आहे. मृत्यूचे नेमके कारण स्पष्ट करण्यासाठी शवविच्छेदन करण्यात आले असून, घटनेबाबत अधिक माहिती मिळवण्यासाठी पोलिसांकडून तपास सुरू आहे. तसेच, घटनेच्या वेळी त्या लोकलमध्ये प्रवास करणारे प्रवासी किंवा प्रत्यक्षदर्शी यांचा शोध घेण्याचे कामही पोलिसांकडून सुरू आहे.

दरम्यान, परीक्षेच्या काळात विद्यार्थ्यांना मोठ्या तणावात प्रवास करावा लागतो. सकाळच्या वेळेत लोकलमधील गर्दी ही जीवघेणी ठरत असल्याच्या घटना वारंवार घडत असून, या घटनेमुळे रेल्वे प्रवाशांच्या सुरक्षिततेचा प्रश्न पुन्हा एकदा ऐरणीवर आला आहे. अवघ्या १८ वर्षांच्या विद्यार्थ्याच्या अकाली मृत्यूमुळे कठरे कुटुंबावर शोककळा पसरली असून, परिसरात हळहळ व्यक्त करण्यात येत आहे.

The post १२ वीची परीक्षा देण्यासाठी निघालेल्या विद्यार्थ्याचा रेल्वे अपघातात मृत्यू” डोंबिवली–कळवा मार्गावर सकाळची गर्दी ठरली घातक appeared first on Satara Pratinidhi.

कपाळावर अशोकस्तंभ, खांद्यावर चमकणारे तारे आणि अंगात खाकी वर्दी-मात्र चेहऱ्यावर अजूनही महाविद्यालयीन तरुणाचीच छाप. राजस्थान केडरमधील सर्वात तरुण आयपीएस अधिकारी म्हणून अभिजीत पाटील सध्या चर्चेच्या केंद्रस्थानी आले आहेत. जेनरेशन झेडमधील या अधिकाऱ्याने कोणत्याही महागड्या कोचिंगशिवाय, पहिल्याच प्रयत्नात केंद्रीय लोकसेवा आयोगाची (UPSC) परीक्षा उत्तीर्ण करून अनेकांसमोर नवा आदर्श ठेवला आहे.

११ जून १९९९ रोजी ठाण्यात जन्मलेल्या अभिजीत पाटील यांनी बी.टेक. (सिव्हिल व एन्व्हायर्नमेंटल इंजिनीअरिंग) शिक्षण घेत असतानाच यूपीएससीची तयारी सुरू केली. विशेष म्हणजे, पदवी परीक्षेचा अंतिम निकाल लागण्यापूर्वीच त्यांनी यूपीएससीची पूर्वपरीक्षा उत्तीर्ण केली होती. २०२२ च्या यूपीएससी परीक्षेत देशात ४७० वी रँक मिळवत त्यांनी आयपीएस पदावर आपली निवड निश्चित केली. वयाच्या अवघ्या २२ व्या वर्षी आयपीएस होणाऱ्या अभिजीत पाटील यांची देशातील सर्वात तरुण आयपीएस अधिकाऱ्यांपैकी गणना होते.

कमी वयात मोठी जबाबदारी त्यांच्या खांद्यावर आली असली, तरी आत्मविश्वास आणि कामातील शिस्तीमुळे त्यांनी आपली वेगळी ओळख निर्माण केली आहे. ‘बेबी फेस’मुळे अनेकदा लोक गोंधळतात; मात्र निर्णयक्षमता आणि कार्यतत्परतेमुळे ते सहकाऱ्यांमध्येही विश्वासार्ह ठरले आहेत.

अभिजीत यांचे वडील बृहन्मुंबई महानगरपालिकेत मुख्य लेखापरीक्षक म्हणून कार्यरत होते, तर आई सिंचन विभागात सेवेत होत्या. दोघेही सध्या निवृत्त आहेत. ठाणे येथे राहणाऱ्या या कुटुंबाचा मूळचा महाराष्ट्राशी घट्ट संबंध आहे. अभिजीत यांना दोन बहिणी असून ते कुटुंबातील धाकटे आहेत.

पदवीच्या शेवटच्या वर्षातच यूपीएससीचा अभ्यास सुरू करणाऱ्या अभिजीत पाटील यांचे वय २०२६ मध्ये २६ वर्षे आहे. मात्र त्यांच्या जिद्दीचा आणि शिस्तबद्ध तयारीचा प्रवास पाहता, अनुभवाने मोठ्या असलेल्यांनाही त्यांचा अभिमान वाटावा असा हा प्रवास आहे. वय लहान असले तरी कर्तृत्व मोठे असू शकते, याचेच जिवंत उदाहरण म्हणजे अभिजीत पाटील.

The post दिसायला तरुण, कर्तृत्व मात्र परिपक्व; २२ व्या वर्षी आयपीएस झालेला मराठी चेहरा appeared first on Satara Pratinidhi.